Хĕрлĕ Чутай вăтам шкулĕнче мухтавлă ентешсене халалланă конференци иртрĕ

Хĕрлĕ Чутай районĕ… Мĕнле хитре, пуян вăл. Пуян анлă уй-хирĕсемпе, сип-симĕс вăрманĕсемпе, анлă шывĕсемпе. Пуян талантлă, ĕçчен те пултаруллă, мухтавлă çыннисемпе. Вĕсен ячĕ хамăр районпа республикăра кăна мар, Раççейре те, тĕнчипе те паллă.

Шăпах паян, çу уйăхĕн 19-мĕшĕнче, Хĕрлĕ Чутай вăтам шкулĕнче мухтавлă ентешсене халалланă конференци иртрĕ. Конференцие район администрацин пуçлăхĕ Иван Михопаров уçрĕ. Чăвашсен кивĕ çырулăхне йĕркелекенĕ, вĕрентÿçĕ, çыравçă тата куçаруçă – Ермей Рожанский пирки Виталий Родионов паллă тĕпчевçĕ, профессор питĕ кăсăклă каласа пачĕ. Ермей Ивановичăн пурнăçĕпе, ĕçĕ-хĕлĕпе паллаштарчĕ.

Е. И. Рожанский Чулхула облаçĕнчи Кăрмăшра священник кил-йышĕнче çуралнă. Вăл чăвашла словарьсем, тĕрленчĕксем, çырусем пичетлесе кăларнă, «Кĕске катехизиса» чăвашла куçарнă, чăваш чĕлхин пĕрремĕш грамматикине — «Сочинения, принадлежащие к грамматике чувашского языка» — çырас ĕçе те активлă хутшăннă.

Аваллăхсăр малашлăх çук теççĕ. Апла пулсан хамăр несĕлсене асрах тытмалла. Вĕсем çинчен шкул ачисен пĕлмеллех, пирĕн вара – вĕрентмеллех.

Ермей Рожанский пирки тӗплӗнрех ҫак ссылкӑпа http://elbib.nbchr.ru/lib_files/0/kkni_0_0001007.pdf кӗрсе В.Г. Родионов ҫырнӑ кӗнекере паллашма пулать.